'ਮੈਂ ਐੱਮ.ਕੇ. ਸਟਾਲਿਨ ਦਾ ਪੁੱਤਰ ਹਾਂ, ਗ੍ਰਿਫ਼ਤਾਰੀ ਤੋਂ ਨਹੀਂ ਡਰਦਾ...': ਤ੍ਰਿਸ਼ਾ ਮਾਮਲੇ 'ਚ ਰਿਹਾਈ ਤੋਂ ਬਾਅਦ ਉਦੈਨਿਧੀ ਦਾ ਵਿਜੇ 'ਤੇ ਤਿੱਖਾ ਨਿਸ਼ਾਨਾ

ਡਿਜੀਟਲ ਡੈਸਕ, ਚੇਨਈ: ਅਦਾਕਾਰਾ ਤ੍ਰਿਸ਼ਾ 'ਤੇ ਡਬਲ ਮੀਨਿੰਗ ਟਿੱਪਣੀ ਕਰਨ ਦੇ ਦੋਸ਼ 'ਚ ਗ੍ਰਿਫ਼ਤਾਰ ਹੋਣ ਦੇ ਕੁਝ ਹੀ ਘੰਟਿਆਂ ਬਾਅਦ ਉਦੈਨਿਧੀ ਸਟਾਲਿਨ ਨੂੰ ਅਦਾਲਤ ਤੋਂ ਰਾਹਤ ਮਿਲ ਗਈ ਸੀ। ਇਸ ਰਿਹਾਈ ਤੋਂ ਬਾਅਦ ਉਦੈਨਿਧੀ ਨੇ ਦੇਰ ਰਾਤ ਸੋਸ਼ਲ ਮੀਡੀਆ ਸਾਈਟ X (ਟਵਿੱਟਰ) 'ਤੇ ਪੋਸਟ ਕਰਕੇ ਆਪਣੀ ਸਿਆਸੀ ਵਿਰਾਸਤ ਦਾ ਜ਼ਿਕਰ ਕੀਤਾ।

ਉਦੈਨਿਧੀ ਨੇ ਆਪਣੇ ਪਿਤਾ ਐੱਮ.ਕੇ. ਸਟਾਲਿਨ ਨਾਲ ਇੱਕ ਤਸਵੀਰ ਸਾਂਝੀ ਕਰਦਿਆਂ ਲਿਖਿਆ ਕਿ ਉਹ ਮੁਥੁਵੇਲ ਕਰੁਣਾਨਿਧੀ ਸਟਾਲਿਨ ਦੇ ਪੁੱਤਰ ਹਨ ਅਤੇ ਅਜਿਹੇ ਹਥਕੰਡਿਆਂ ਤੋਂ ਨਹੀਂ ਡਰਦੇ। ਉਨ੍ਹਾਂ ਨੇ ਵਿਜੇ ਦੀ ਸਰਕਾਰ 'ਤੇ ਝੂਠੇ ਕੇਸ ਦਰਜ ਕਰਨ ਦਾ ਦੋਸ਼ ਲਗਾਉਂਦਿਆਂ ਕਿਹਾ ਕਿ ਮੈਨੂੰ ਗ੍ਰਿਫ਼ਤਾਰੀ ਦਾ ਕੋਈ ਡਰ ਨਹੀਂ ਹੈ।

ਝੂਠੇ ਕੇਸ ਦਰਜ ਕਰਨ ਦਾ ਲਗਾਇਆ ਦੋਸ਼

ਉਨ੍ਹਾਂ ਲਿਖਿਆ, "ਝੂਠੇ ਕੇਸ ਦਰਜ ਕਰਕੇ ਤੇ ਮੈਨੂੰ ਚੇਨਈ ਤੇ ਤੰਜਾਵੁਰ ਦੇ ਵਿਚਕਾਰ ਵਾਰ-ਵਾਰ ਦੌੜਾ ਕੇ ਉਨ੍ਹਾਂ ਨੇ ਕਿਸੇ ਨੂੰ ਖ਼ੁਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। ਗ੍ਰਿਫ਼ਤਾਰੀ ਤੋਂ ਬਾਅਦ, ਮੈਂ ਮੀਡੀਆ ਨੂੰ ਕਿਹਾ ਕਿ ਮੈਂ ਇਸ ਪੂਰੇ ਮਾਮਲੇ ਨੂੰ ਇੱਕ ਨਾਟਕ ਮੰਨਦਾ ਹਾਂ। ਮੈਂ ਪੁਲਿਸ ਦੇ ਡਰ ਤੋਂ ਭੱਜਿਆ ਨਹੀਂ।"

ਉਦੈਨਿਧੀ ਨੇ ਅੱਗੇ ਲਿਖਿਆ, "ਪੂਰਾ ਦੇਸ਼ ਜਾਣਦਾ ਹੈ ਕਿ ਮੌਜੂਦਾ ਮੁੱਖ ਮੰਤਰੀ, ਜਦੋਂ ਕਰੂਰ ਵਿੱਚ 41 ਲੋਕਾਂ ਦੀ ਮੌਤ ਹੋਈ ਸੀ ਤਾਂ ਗ੍ਰਿਫ਼ਤਾਰੀ ਦੇ ਡਰ ਤੋਂ ਘਬਰਾ ਕੇ ਭੱਜ ਗਏ ਸਨ। ਉਨ੍ਹਾਂ ਨੇ ਨਾ ਤਾਂ ਪੀੜਤ ਪਰਿਵਾਰਾਂ ਨਾਲ ਮੁਲਾਕਾਤ ਕੀਤੀ ਤੇ ਨਾ ਹੀ ਮੀਡੀਆ ਦਾ ਸਾਹਮਣਾ ਕੀਤਾ।"

ਕਿਸਾਨਾਂ ਦਾ ਕੀਤਾ ਜ਼ਿਕਰ

ਉਦੈਨਿਧੀ ਨੇ ਵਿਜੇ 'ਤੇ ਨਿਸ਼ਾਨਾ ਸਾਧਦਿਆਂ ਲਿਖਿਆ ਕਿ ਕਰੂਰ ਵਿੱਚ ਇੰਨੀਆਂ ਜਾਨਾਂ ਜਾਣ ਤੋਂ ਬਾਅਦ ਵੀ ਉਹ ਸਿਰਫ਼ ਇੱਕ ਮਹੀਨੇ ਬਾਅਦ ਇੱਕ ਫ਼ਿਲਮ ਦੇ ਪ੍ਰਮੋਸ਼ਨ ਲਈ ਡਾਂਸ ਕਰਨ ਮਲੇਸ਼ੀਆ ਚਲੇ ਗਏ। ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ ਨੂੰ ਗ੍ਰਿਫ਼ਤਾਰੀ ਦਾ ਡਰ ਹੋ ਸਕਦਾ ਹੈ, ਪਰ ਮੈਨੂੰ ਨਹੀਂ। ਮੈਂ ਕਲੈਗਨਾਰ ਦਾ ਪੋਤਾ ਅਤੇ ਮੁਥੁਵੇਲ ਕਰੁਣਾਨਿਧੀ ਸਟਾਲਿਨ ਦਾ ਪੁੱਤਰ ਹਾਂ।

ਕਿਸਾਨਾਂ ਦਾ ਜ਼ਿਕਰ ਕਰਦਿਆਂ ਉਦੈਨਿਧੀ ਸਟਾਲਿਨ ਨੇ ਲਿਖਿਆ, "ਜੇਕਰ ਕਿਸਾਨਾਂ ਲਈ ਲੜਨ ਕਾਰਨ ਗ੍ਰਿਫ਼ਤਾਰ ਹੋਣਾ ਪੈਂਦਾ ਹੈ, ਤਾਂ ਮੈਂ ਇੱਕ ਵਾਰ ਨਹੀਂ, ਸਗੋਂ ਸੌ ਵਾਰ ਗ੍ਰਿਫ਼ਤਾਰ ਹੋਣ ਲਈ ਤਿਆਰ ਹਾਂ। ਮੈਂ ਕਿਸਾਨਾਂ ਦੀ ਭਲਾਈ ਲਈ ਸਿਰਫ਼ 300 ਕਿਲੋਮੀਟਰ ਹੀ ਨਹੀਂ, ਸਗੋਂ 3000 ਕਿਲੋਮੀਟਰ ਤੋਂ ਵੱਧ ਪੈਦਲ ਮਾਰਚ ਕਰਨ ਲਈ ਤਿਆਰ ਹਾਂ। ਤੁਹਾਡੇ ਧੱਕੇਸ਼ਾਹੀ ਵਾਲੇ ਹਥਕੰਡੇ ਲੋਕਾਂ ਦੀ ਸੇਵਾ ਕਰਨ ਦੇ ਸਾਡੇ ਰਾਹ ਵਿੱਚ ਕਦੇ ਰੁਕਾਵਟ ਨਹੀਂ ਬਣ ਸਕਣਗੇ।"