- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
‘ਪਤਨੀ ਵੇਚ ਦਿਓ... ਪਰ ਪੈਸੇ ਦਿਓ’, ਫਰਜ਼ੀ ED ਨੋਟਿਸ ਰਾਹੀਂ ਕਰੋੜਾਂ ਦੀ ਠੱਗੀ ਦਾ ਸ਼ਿਕਾਰ ਬਣਿਆ ਯੁਵਰਾਜ ਮਨਚੰਦਾ; WhatsApp ਚੈਟ ਤੋਂ ਖੁਲਾਸਾ
ਗੁਰੂਗ੍ਰਾਮ 'ਚ ਅਡਾਨੀ ਰੀਅਲਟੀ ਦੇ 31 ਸਾਲਾ ਪ੍ਰੋਜੈਕਟ ਮੈਨੇਜਰ ਯੁਵਰਾਜ ਸਿੰਘ ਮਨਚੰਦਾ ਦੇ ਕਤਲ ਦੀ ਜਾਂਚ ਜਿਵੇਂ-ਜਿਵੇਂ ਅੱਗੇ ਵਧ ਰਹੀ ਹੈ, ਮੁਲਜ਼ਮ ਅਨਿਆ ਵਤਸ ਅਤੇ ਉਸ ਦੇ ਸਾਥੀ ਸੰਜਮ ਸਚਦੇਵਾ ਵੱਲੋਂ ਕੀਤੀਆਂ ਕਥਿਤ ਠੱਗੀਆਂ ਦੇ ਮਾਮਲੇ ਵੀ ਸਾਹਮਣੇ ਆ ਰਹੇ ਹਨ। ਪੁਲਿਸ ਹੁਣ ਇਸ ਪੱਖ ਦੀ ਵੀ ਜਾਂਚ ਕਰ ਰਹੀ ਹੈ ਕਿ ਕੀ ਯੁਵਰਾਜ ਨੂੰ ਮੁਲਜ਼ਮਾਂ ਦੀ ਠੱਗੀ ਬਾਰੇ ਕੋਈ ਜਾਣਕਾਰੀ ਹੋ ਗਈ ਸੀ। ਯੁਵਰਾਜ ਦਾ 6 ਸਤੰਬਰ ਨੂੰ ਕਤਲ ਕੀਤਾ ਗਿਆ ਸੀ।
Posted By Sunita
Publish Date: Sun, 20 Sep 2026 10:21 AM (IST)
Updated Date: Sun, 20 Sep 2026 10:22 AM (IST)
ਡਿਜ਼ੀਟਲ ਡੈਸਕ, ਨਵੀਂ ਦਿੱਲੀ - ਗੁਰੂਗ੍ਰਾਮ 'ਚ ਅਡਾਨੀ ਰੀਅਲਟੀ ਦੇ 31 ਸਾਲਾ ਪ੍ਰੋਜੈਕਟ ਮੈਨੇਜਰ ਯੁਵਰਾਜ ਸਿੰਘ ਮਨਚੰਦਾ ਦੇ ਕਤਲ ਦੀ ਜਾਂਚ ਜਿਵੇਂ-ਜਿਵੇਂ ਅੱਗੇ ਵਧ ਰਹੀ ਹੈ, ਮੁਲਜ਼ਮ ਅਨਿਆ ਵਤਸ ਅਤੇ ਉਸ ਦੇ ਸਾਥੀ ਸੰਜਮ ਸਚਦੇਵਾ ਵੱਲੋਂ ਕੀਤੀਆਂ ਕਥਿਤ ਠੱਗੀਆਂ ਦੇ ਮਾਮਲੇ ਵੀ ਸਾਹਮਣੇ ਆ ਰਹੇ ਹਨ। ਪੁਲਿਸ ਹੁਣ ਇਸ ਪੱਖ ਦੀ ਵੀ ਜਾਂਚ ਕਰ ਰਹੀ ਹੈ ਕਿ ਕੀ ਯੁਵਰਾਜ ਨੂੰ ਮੁਲਜ਼ਮਾਂ ਦੀ ਠੱਗੀ ਬਾਰੇ ਕੋਈ ਜਾਣਕਾਰੀ ਹੋ ਗਈ ਸੀ। ਯੁਵਰਾਜ ਦਾ 6 ਸਤੰਬਰ ਨੂੰ ਕਤਲ ਕੀਤਾ ਗਿਆ ਸੀ।
ਜਾਂਚ 'ਚ ਸਾਹਮਣੇ ਆਇਆ ਹੈ ਕਿ ਮੁਲਜ਼ਮਾਂ ਖ਼ਿਲਾਫ਼ ਇੱਕ ਪੁਰਾਣੇ ਜਾਣਕਾਰ ਨਾਲ 1.2 ਕਰੋੜ ਰੁਪਏ ਤੋਂ ਵੱਧ ਦੀ ਕਥਿਤ ਠੱਗੀ ਦਾ ਮਾਮਲਾ ਦਰਜ ਹੈ। ਦੋਸ਼ ਹੈ ਕਿ ਫਰਜ਼ੀ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਦੇ ਨੋਟਿਸ ਅਤੇ ਸਰਕਾਰੀ ਵਿਭਾਗਾਂ 'ਚ ਉੱਚ ਪੱਧਰੀ ਪਹੁੰਚ ਹੋਣ ਦਾ ਦਾਅਵਾ ਕਰਕੇ ਪੈਸੇ ਵਸੂਲੇ ਗਏ। ਇਸ ਮਾਮਲੇ 'ਚ ਇਸੇ ਸਾਲ ਅਗਸਤ 'ਚ ਸੰਸਦ ਮਾਰਗ ਥਾਣੇ 'ਚ ਕੇਸ ਦਰਜ ਕੀਤਾ ਗਿਆ ਸੀ।
ਫਰਜ਼ੀ ED ਨੋਟਿਸ ਨਾਲ ਸ਼ੁਰੂ ਹੋਇਆ ਖੇਡ
ਪੁਲਿਸ ਮੁਤਾਬਕ, ਸੰਜਮ ਸਚਦੇਵਾ ਦੇ ਇੱਕ ਪੁਰਾਣੇ ਸਕੂਲਮੇਟ ਨੂੰ ਕਥਿਤ ਤੌਰ ’ਤੇ WhatsApp ’ਤੇ ਫਰਜ਼ੀ ED ਨੋਟਿਸ ਭੇਜਿਆ ਗਿਆ। ਇਸ 'ਚ ਉਸ ਖ਼ਿਲਾਫ਼ ਗੰਭੀਰ ਧਾਰਾਵਾਂ ਤਹਿਤ ਮਾਮਲਾ ਦਰਜ ਹੋਣ ਦੀ ਗੱਲ ਕਹੀ ਗਈ ਸੀ। ਦੋਸ਼ ਹੈ ਕਿ ਸੰਜਮ ਅਤੇ ਅਨਿਆ ਨੇ ਆਪਣੇ ਸੰਪਰਕਾਂ ਦਾ ਹਵਾਲਾ ਦੇ ਕੇ ਮਾਮਲਾ ਨਿਪਟਾਉਣ ਦਾ ਭਰੋਸਾ ਦਿੱਤਾ।
ਜਾਂਚ 'ਚ ਇਹ ਵੀ ਦੋਸ਼ ਸਾਹਮਣੇ ਆਇਆ ਹੈ ਕਿ ਦੋਵਾਂ ਨੇ ਕੇਂਦਰੀ ਗ੍ਰਹਿ ਮੰਤਰਾਲੇ ਦੇ ਨਾਮ ’ਤੇ ਫਰਜ਼ੀ ਨੋਟਿਸ ਤਿਆਰ ਕੀਤੇ। ਇਨ੍ਹਾਂ 'ਚ ਧਨ-ਸ਼ੋਧਨ ਰੋਕਥਾਮ ਕਾਨੂੰਨ (PMLA), NDPS ਐਕਟ ਅਤੇ UAPA ਵਰਗੀਆਂ ਧਾਰਾਵਾਂ ਦਾ ਜ਼ਿਕਰ ਕੀਤਾ ਗਿਆ ਸੀ। ਇਸ ਰਾਹੀਂ ਪੀੜਤ ’ਤੇ ਪੈਸੇ ਦੇਣ ਲਈ ਦਬਾਅ ਬਣਾਇਆ ਗਿਆ।
1.2 ਕਰੋੜ ਦਿੱਤੇ, ਫਿਰ 26 ਕਰੋੜ ਹੋਰ ਮੰਗੇ
ਸ਼ਿਕਾਇਤਕਰਤਾ ਮੁਤਾਬਕ, ਉਸ ਨੇ ਆਪਣੀ ਬਚਤ, ਕਰਜ਼ਾ ਅਤੇ ਪਰਿਵਾਰ ਤੋਂ ਉਧਾਰ ਲੈ ਕੇ 1.2 ਕਰੋੜ ਰੁਪਏ ਤੋਂ ਵੱਧ ਦੀ ਰਕਮ ਦਿੱਤੀ। ਦੱਸਿਆ ਗਿਆ ਹੈ ਕਿ ਇਸ 'ਚੋਂ ਜ਼ਿਆਦਾਤਰ ਪੈਸਾ ਅਨਿਆ ਵਤਸ ਦੇ ਬੈਂਕ ਖਾਤੇ 'ਚ ਟਰਾਂਸਫਰ ਕੀਤਾ ਗਿਆ।
ਇਸ ਤੋਂ ਬਾਅਦ ਉਸ ਤੋਂ ਹੋਰ 26 ਕਰੋੜ ਰੁਪਏ ਮੰਗੇ ਗਏ। ਦਾਅਵਾ ਕੀਤਾ ਗਿਆ ਕਿ ਉਸ ਦਾ ਮਾਮਲਾ ਨਿਪਟਾਉਣ ਲਈ ਸਰਕਾਰੀ ਏਜੰਸੀਆਂ ਨੂੰ 13.8 ਕਰੋੜ ਰੁਪਏ ਦਿੱਤੇ ਜਾ ਚੁੱਕੇ ਹਨ। ਬਾਅਦ 'ਚ ਸ਼ਿਕਾਇਤਕਰਤਾ ਨੂੰ ਠੱਗੀ ਦਾ ਅਹਿਸਾਸ ਹੋਇਆ ਅਤੇ ਉਸ ਨੇ ਪੁਲਿਸ ਨਾਲ ਸੰਪਰਕ ਕੀਤਾ। FIR 'ਚ ਇੱਕ WhatsApp ਸੰਦੇਸ਼ ਦਾ ਵੀ ਜ਼ਿਕਰ ਹੈ, ਜਿਸ 'ਚ ਪੈਸੇ ਵਾਪਸ ਕਰਨ ਲਈ ਦਬਾਅ ਬਣਾਇਆ ਗਿਆ ਸੀ। ਇਸ ਸੰਦੇਸ਼ 'ਚ ਕਥਿਤ ਤੌਰ ’ਤੇ ਲਿਖਿਆ ਸੀ: “ਆਪਣੀ ਪਤਨੀ ਨੂੰ ਵੇਚ ਦਿਓ/ਕੁਝ ਵੀ ਕਰੋ, ਬੱਸ ਇਹ ਪੈਸੇ ਵਾਪਸ ਕਰੋ।”
4.5 ਕਰੋੜ ਦੀ ਜਾਇਦਾਦ ਦਾ ਮਾਮਲਾ
ਪੁਲਿਸ ਸੂਤਰਾਂ ਮੁਤਾਬਕ, ਸੰਜਮ ਸਚਦੇਵਾ ’ਤੇ ਆਪਣੀ ਵੱਖ ਰਹਿ ਰਹੀ ਪਤਨੀ ਨੂੰ ਵੀ ਕਰੀਬ 4.5 ਕਰੋੜ ਰੁਪਏ ਦੀ ਜਾਇਦਾਦ ਦੇ ਮਾਮਲੇ 'ਚ ਠੱਗਣ ਦਾ ਦੋਸ਼ ਹੈ। ਉਸ ਦੀ ਪਤਨੀ ਦੀ ਸ਼ਿਕਾਇਤ ’ਤੇ ਘਰੇਲੂ ਹਿੰਸਾ ਦਾ ਮਾਮਲਾ ਵੀ ਦਰਜ ਹੋਣ ਦੀ ਗੱਲ ਸਾਹਮਣੇ ਆਈ ਹੈ। ਪੁਲਿਸ ਹੁਣ ਇਹ ਪਤਾ ਲਗਾਉਣ 'ਚ ਜੁਟੀ ਹੈ ਕਿ ਯੁਵਰਾਜ ਨੂੰ ਇਨ੍ਹਾਂ ਗਤੀਵਿਧੀਆਂ ਬਾਰੇ ਕੀ ਜਾਣਕਾਰੀ ਸੀ ਅਤੇ ਕੀ ਇਹੀ ਗੱਲ ਕਤਲ ਦੇ ਪਿੱਛੇ ਕੋਈ ਕਾਰਨ ਹੋ ਸਕਦੀ ਹੈ।
ਕਲਾਇੰਟ ਮੀਟਿੰਗ ਦੇ ਬਹਾਨੇ ਬੁਲਾਇਆ
ਜਾਂਚ 'ਚ ਸਾਹਮਣੇ ਆਇਆ ਹੈ ਕਿ ਕਤਲ ਵਾਲੇ ਦਿਨ ਅਨਿਆ ਵਤਸ ਅਤੇ ਸੰਜਮ ਸਚਦੇਵਾ ਨੇ ਯੁਵਰਾਜ ਨੂੰ ਕਲਾਇੰਟ ਮੀਟਿੰਗ ਦੇ ਬਹਾਨੇ ਬੁਲਾਇਆ ਸੀ। ਪਰਿਵਾਰ ਦੇ ਇੱਕ ਦੋਸਤ ਮੁਤਾਬਕ, ਯੁਵਰਾਜ ਨੇ ਆਪਣੀ ਮੰਗੇਤਰ ਨੂੰ ਦੱਸਿਆ ਸੀ ਕਿ ਉਹ ਅਨਿਆ ਨਾਲ ਕਲਾਇੰਟ ਨੂੰ ਮਿਲਣ ਜਾ ਰਿਹਾ ਹੈ ਅਤੇ ਕਰੀਬ 20 ਮਿੰਟ 'ਚ ਫੋਨ ਕਰੇਗਾ।
ਇਸ ਤੋਂ ਬਾਅਦ ਯੁਵਰਾਜ ਲਾਪਤਾ ਹੋ ਗਿਆ। ਪੁਲਿਸ ਮੁਤਾਬਕ, ਮਾਮਲੇ 'ਚ ਮੁਲਜ਼ਮਾਂ ਦੇ ਬਿਆਨਾਂ 'ਚ ਪੈਸਿਆਂ ਦੇ ਵਿਵਾਦ ਨੂੰ ਲੈ ਕੇ ਵੀ ਲਗਾਤਾਰ ਬਦਲਾਅ ਸਾਹਮਣੇ ਆਏ ਹਨ। ਅਨਿਆ ਨੇ ਯੁਵਰਾਜ ’ਤੇ ਧਮਕੀ ਦੇਣ ਦਾ ਦੋਸ਼ ਲਗਾਇਆ ਹੈ, ਹਾਲਾਂਕਿ ਜਾਂਚ ਅਧਿਕਾਰੀ ਮੁਤਾਬਕ ਹੁਣ ਤੱਕ ਇਸ ਦਾਅਵੇ ਦੇ ਸਮਰਥਨ 'ਚ ਕੋਈ ਸਬੂਤ ਨਹੀਂ ਮਿਲਿਆ ਹੈ।
ਲਾਸ਼ ਨੂੰ ਠਿਕਾਣੇ ਲਗਾਉਣ ਦੇ ਤਰੀਕੇ ਦੀ ਵੀ ਜਾਂਚ
ਪੁਲਿਸ ਨੇ ਇੱਕ ਗੈਰ-ਕਾਨੂੰਨੀ ਪਿਸਤੌਲ ਅਤੇ ਯੁਵਰਾਜ ਦੀ ਕਾਰ ਬਰਾਮਦ ਕੀਤੀ ਹੈ। ਦੋਵਾਂ ਨੂੰ ਫੋਰੈਂਸਿਕ ਜਾਂਚ ਲਈ ਭੇਜਿਆ ਗਿਆ ਹੈ। ਮੁਲਜ਼ਮਾਂ ਦੇ ਮੋਬਾਈਲ ਫੋਨਾਂ ਸਮੇਤ ਇਲੈਕਟ੍ਰਾਨਿਕ ਉਪਕਰਣ ਵੀ FSL ਨੂੰ ਭੇਜੇ ਗਏ ਹਨ।
ਜਾਂਚ ਏਜੰਸੀਆਂ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀਆਂ ਹਨ ਕਿ ਕੀ ਮੁਲਜ਼ਮਾਂ ਨੇ ਇੰਟਰਨੈੱਟ ’ਤੇ ਲਾਸ਼ ਨੂੰ ਠਿਕਾਣੇ ਲਗਾਉਣ ਦੇ ਤਰੀਕੇ ਖੋਜੇ ਸਨ। ਪੁਲਿਸ ਨੂੰ ਇਹ ਵੀ ਪਤਾ ਲੱਗਾ ਹੈ ਕਿ ਕਤਲ ਤੋਂ ਬਾਅਦ ਉੱਤਰਾਖੰਡ ਭੱਜਦੇ ਸਮੇਂ ਮੁਲਜ਼ਮ ਵ੍ਰਿੰਦਾਵਨ 'ਚ ਰੁਕੇ ਸਨ। ਪੁਲਿਸ ਇਸ ਠਹਿਰਾਅ ਦੇ ਕਾਰਨ ਦੀ ਵੀ ਜਾਂਚ ਕਰ ਰਹੀ ਹੈ।
ZIPNET ਨੂੰ ਲੈ ਕੇ ਪਰਿਵਾਰ ਨੇ ਉਠਾਏ ਸਵਾਲ
ਯੁਵਰਾਜ ਦੀ ਲਾਸ਼ 10 ਸਤੰਬਰ ਨੂੰ ਗੁਰੂਗ੍ਰਾਮ 'ਚ ਮਿਲੀ ਸੀ। ਪਰਿਵਾਰ ਦਾ ਦੋਸ਼ ਹੈ ਕਿ 16 ਸਤੰਬਰ ਤੱਕ ਵੀ ਗੁਰੂਗ੍ਰਾਮ ਪੁਲਿਸ ਨੇ ਉਸ ਦੀ ਜਾਣਕਾਰੀ ZIPNET ’ਤੇ ‘Unidentified persons found’ ਸ਼੍ਰੇਣੀ 'ਚ ਦਰਜ ਕੀਤੀ ਹੋਈ ਸੀ, ਜਦਕਿ ਲਾਸ਼ ਮਿਲਣ ਕਾਰਨ ਇਸਨੂੰ ‘Unidentified dead bodies’ ਸ਼੍ਰੇਣੀ 'ਚ ਦਰਜ ਕੀਤਾ ਜਾਣਾ ਚਾਹੀਦਾ ਸੀ।
ਹਾਲਾਂਕਿ, ਗੁਰੂਗ੍ਰਾਮ ਪੁਲਿਸ ਨੇ ਕਿਸੇ ਵੀ ਤਰ੍ਹਾਂ ਦੀ ਦੇਰੀ ਤੋਂ ਇਨਕਾਰ ਕੀਤਾ ਹੈ। ਇੱਕ ਸੀਨੀਅਰ ਅਧਿਕਾਰੀ ਮੁਤਾਬਕ, ਦਿੱਲੀ ਪੁਲਿਸ ਨੂੰ ਪਰਿਵਾਰ ਤੋਂ ਸੂਚਨਾ ਮਿਲਣ ਦੇ 24 ਘੰਟਿਆਂ ਦੇ ਅੰਦਰ ਗੁੰਮਸ਼ੁਦਗੀ ਦੀ FIR ਦਰਜ ਕਰਨੀ ਚਾਹੀਦੀ ਸੀ ਅਤੇ ਇਹ ਜਾਣਕਾਰੀ ਸਮੇਂ ਸਿਰ ਗੁਰੂਗ੍ਰਾਮ ਪੁਲਿਸ ਨਾਲ ਸਾਂਝੀ ਕਰਨੀ ਚਾਹੀਦੀ ਸੀ, ਕਿਉਂਕਿ ਯੁਵਰਾਜ ਗੁਰੂਗ੍ਰਾਮ 'ਚ ਕੰਮ ਕਰਦਾ ਸੀ।