ਹੜ੍ਹ ਸੁਰੱਖਿਆ ਪ੍ਰਬੰਧਾਂ ਲਈ ਮੋਹਰੀ ਬਣ ਕੇ ਵੱਡੇ ਸੇਵਾ ਕਾਰਜ ’ਚ ਜੁੱਟੀ ਸੰਪਰਦਾਇ ਕਾਰ ਸੇਵਾ ਸਰਹਾਲੀ ਸਾਹਿਬ

- ਪਿੰਡ ਚੱਕ ਪੱਤੀ ਬਾਲੂ ਬਹਾਦਰ ’ਚ 13 ਮਈ ਤੋਂ ਚੱਲ ਰਹੀ ਹੈ ਆਰਜੀ ਬੰਨ੍ਹ ਮਜ਼ਬੂਤੀ ਲਈ ਸੇਵਾ - ਰੋਜ਼ਾਨਾ ਇਕ ਹਜ਼ਾਰ ਲਿਟਰ ਡੀਜ਼ਲ ਦੀ ਖਪਤ ਹੋ ਰਹੀ ਹੈ ਲਵਦੀਪ ਦੇਵਗਨ, •ਪੰਜਾਬੀ ਜਾਗਰਣ ਸਰਹਾਲੀ ਕਲਾਂ : ਜਿਵੇਂ ਬੀਤੇ ਸਮੇਂ ਦੌਰਾਨ ਪੰਜਾਬ ਵਾਸੀਆਂ ਨੂੰ ਹੜ੍ਹਾਂ ਦੀ ਬਹੁਤ ਭਿਆਨਕ ਮਾਰ ਪਈ ਸੀ ਤੇ ਵੱਖ-ਵੱਖ ਸੰਸਥਾਵਾਂ ਵੱਲੋਂ ਉਸ ਵੇਲੇ ਵੱਡੇ ਪੱਧਰ ’ਤੇ ਰਾਹਤ ਕਾਰਜ ਵੀ ਕੀਤੇ ਗਏ ਸਨ। ਬਿਪਤਾ ਆਉਣ ’ਤੇ ਸੇਵਾ ਕਰਨ ਨਾਲੋਂ ਵਧੀਕ ਚੰਗਾ ਹੈ ਜੇਕਰ ਬਿਪਤਾ ਨੂੰ ਕਿਸੇ ਹੱਦ ਤਕ ਟਾਲਿਆ ਜਾ ਸਕੇ ਤੇ ਵੱਖ-ਵੱਖ ਪੱਧਰ ’ਤੇ ਦਰਿਆਈ ਖੇਤਰਾਂ ਦੇ ਸੁਰੱਖਿਆ ਪ੍ਰਬੰਧਾਂ ਵਿਚ ਨਜ਼ਰ ਆਉਂਦੀਆਂ ਤਰੁੱਟੀਆਂ ਦੂਰ ਕੀਤੀਆਂ ਜਾ ਸਕਣ। ਸੰਪਰਦਾਇ ਕਾਰ ਸੇਵਾ ਸਰਹਾਲੀ ਸਾਹਿਬ ਦੇ ਮੁਖੀ ਸੰਤ ਬਾਬਾ ਸੁੱਖਾ ਸਿੰਘ ਨੇ ਹੜ੍ਹ ਸੁਰੱਖਿਆ ਪ੍ਰਬੰਧਾਂ ਨੂੰ ਸੁਧਾਰਦਿਆਂ ਪਿੰਡ ਚੱਕ ਪੱਤੀ ਬਾਲੂ ਬਹਾਦਰ ਵਿਖੇ ਲਗਭਗ 15 ਕਿਲੋਮੀਟਰ ਲੰਬਾ ਆਰਜੀ ਬੰਨ੍ਹ ਮਜ਼ਬੂਤ ਕਰਨ ਲਈ 13 ਮਈ ਨੂੰ ਸੇਵਾ ਕਾਰਜ ਆਰੰਭ ਕੀਤਾ ਸੀ, ਜੋ ਦੋ ਹਫਤੇ ਤੋਂ ਇਹ ਸੇਵਾ ਕਾਰਜ ਜੰਗੀ ਪੱਧਰ ’ਤੇ ਜਾਰੀ ਹੈ। ਅੱਜ ਇੱਥੇ ਜਥੇਦਾਰ ਗੁਰਦੀਪ ਸਿੰਘ ਸ਼ਹੀਦ ਨੇ ਦੱਸਿਆ ਕਿ ਪਿੰਡ ਚੱਕ ਪੱਤੀ ਬਾਲੂ ਬਹਾਦਰ ਵਿਖੇ ਬਿਆਸ ਦਰਿਆ ਦਾ ਅਡਵਾਂਸ ਬੰਨ੍ਹ ਪਹਿਲਾਂ ਦੋ ਵਾਰ ਸਾਲ 2023 ਅਤੇ 2025 ਵਿਚ ਟੁੱਟ ਗਿਆ ਸੀ, ਜਿਸ ਦੀ ਸੇਵਾ ਬਾਬਾ ਜੀ ਨੇ ਕਰਵਾਈ ਸੀ। ਇਹ ਅਡਵਾਂਸ ਬੰਨ੍ਹ ਲਗਭਗ 15 ਕਿਲੋਮੀਟਰ ਲੰਮਾ ਹੈ, ਜਿਸ ਦੇ ਨਾਲ ਪਿੰਡ ਚੱਕ ਪੱਤੀ ਬਾਲੂ ਬਹਾਦਰ, ਕਿਸ਼ਨਪੁਰ ਘੜਕਾ, ਮੰਡ ਕਰਮੂਵਾਲਾ, ਲੋਧੀਵਾਲ, ਸਰਦੁੱਲਾਪੁਰ, ਠੱਕਰਕੌੜਾ, ਹਜ਼ਾਰਾ, ਕਬੀਰਪੁਰ, ਹਾਜੀਪੁਰ ਹੁਸੈਨਪੁਰ ਬੂਲੇ, ਕਬੀਰਪੁਰ, ਲੋਧੀਵਾਲ, ਮੰਡ ਹੁਸੈਨਪੁਰ ਬੂਲੇ ਆਦਿ ਪਿੰਡਾਂ ਦੀ ਜ਼ਮੀਨ ਨਾਲ ਲੱਗਦੀ ਹੈ। ਇਸ ਅਡਵਾਂਸ ਬੰਨ੍ਹ ’ਤੇ ਰਸਤਾ ਬਣਿਆ ਹੈ, ਜੋ ਕਈ ਥਾਂਵਾਂ ਤੋਂ ਕਮਜ਼ੋਰ ਹੈ। 13 ਮਈ ਨੂੰ ਇੱਥੇ ਮਹਾਪੁਰਸ਼ ਸੰਤ ਬਾਬਾ ਸੁੱਖਾ ਸਿੰਘ ਵੱਲੋਂ ਭਾਰੀ ਮਸ਼ੀਨਰੀ ਭੇਜੀ ਗਈ ਸੀ, ਜਿਸ ਵਿਚ ਇਕ ਪੋਕਲੇਨ ਮਸ਼ੀਨ, ਇਕ ਜੇਸੀਬੀ ਮਸ਼ੀਨ, ਟਿੱਪਰ ਅਤੇ ਟਰਾਲੀਆਂ ਹਨ। ਲਗਾਤਾਰ ਚੱਲ ਰਹੇ ਇਸ ਸੇਵਾ ਕਾਰਜ ਲਈ ਰੋਜ਼ਾਨਾ ਲਗਭਗ ਹਜ਼ਾਰ ਲੀਟਰ ਡੀਜ਼ਲ ਦੀ ਖਪਤ ਹੋ ਰਹੀ ਹੈ। ਐੱਮਐੱਲਏ ਰਾਣਾ ਇੰਦਰਪ੍ਰਤਾਪ ਸਿੰਘ ਵੱਲੋਂ ਵੀ ਇਸ ਸੇਵਾ ਵਿਚ ਆਪਣਾ ਯੋਗਦਾਨ ਪਾਇਆ ਜਾ ਰਿਹਾ ਹੈ। ਰੋਜ਼ਾਨਾ 15 ਤੋਂ 20 ਟਰੈਕਟਰ ਲਗਾਤਾਰ ਚੱਲ ਰਹੇ ਹਨ। ਹੜ੍ਹ ਸੁਰੱਖਿਆ ਪ੍ਰਬੰਧਾਂ ਨੂੰ ਮਜ਼ਬੂਤ ਬਣਾਉਂਦਿਆਂ ਬਾਬਾ ਜੀ ਨੇ ਸਰਬੱਤ ਦੇ ਭਲੇ ਹਿੱਤ ਇਹ ਵੱਡਾ ਸੇਵਾ ਕਾਰਜ ਆਰੰਭਿਆ ਹੈ। ਅਸੀਂ ਸਮੂਹ ਇਲਾਕੇ ਦੀਆਂ ਪੰਚਾਇਤਾਂ ਅਤੇ ਮੋਹਤਬਰਾਂ ਵੱਲੋਂ ਬਾਬਾ ਜੀ ਦਾ ਧੰਨਵਾਦ ਕਰਦੇ ਹਾਂ। ਗੁਰੂ ਕਾ ਲੰਗਰ ਰੋਜ਼ਾਨਾ ਗੁਰਦੁਆਰਾ ਬਾਬਾ ਮਾਤਾ ਸੁਲੱਖਣੀ ਜੀ ਸੁਲਤਾਨਪੁਰ ਲੋਧੀ ਤੋਂ ਤਿਆਰ ਕਰਵਾ ਕੇ ਬੰਨ੍ਹ ’ਤੇ ਪਹੁੰਚਾਇਆ ਜਾਂਦਾ ਹੈ। ਇਸ ਮੌਕੇ ਸੰਗਤ ਵਿਚ ਜਥੇਦਾਰ ਹੀਰਾ ਸਿੰਘ, ਸਾਬਕਾ ਸਰਪੰਚ ਕੁੰਦਨ ਸਿੰਘ ਚੱਕ, ਸਰਪੰਚ ਲਖਵਿੰਦਰ ਸਿੰਘ ਚੱਕ, ਬੋਹੜ ਸਿੰਘ ਹਜ਼ਾਰਾ, ਗੁਰਮੁਖ ਸਿੰਘ ਕਰਮੂੰਵਾਲਾ, ਸਾਹਿਬ ਸਿੰਘ ਕਰਮੂੰਵਾਲਾ, ਅਮਰਜੀਤ ਸਿੰਘ ਖਿੰਡਾ ਲੋਧੀਵਾਲ, ਡਾ. ਸਤਨਾਮ ਸਿੰਘ ਹਾਜੀਪੁਰ, ਚਮਕੌਰ ਸਿੰਘ ਹੁਸੈਨਪੁਰ ਬੂਲੇ, ਦਰਸ਼ਨ ਸਿੰਘ ਕਬੀਰਪੁਰ, ਅੰਗਰੇਜ਼ ਸਿੰਘ ਚੱਕ, ਕਰਨੈਲ ਸਿੰਘ ਸਰਦੁੱਲਾਪੁਰ, ਬਗੀਚਾ ਸਿੰਘ ਘੜਕਾ, ਅਰਸ਼ਦੀਪ ਸਿੰਘ ਘੜਕਾ ਤੇ ਹੋਰ ਕਈ ਮੋਹਤਬਰ ਸੱਜਣ ਹਾਜ਼ਰ ਸਨ।